السلام عليكم
أن شاء الله تكونو لابأس و بخير و على خير
بما انو غدا الدخول المدرسي فقررت نحط للبنات بعض الأفكار لي ممكن تنفعها أو لا ما علباليش 😃 المهم تبعوا معايا
في الدخول المدرسي يا لبنات رايحين للثانوي ولى الجامعة ماشي رايحين العرس ولى بحر لازم لكل مكان تلبسوا واش يليق بيه
هاذي بعض الصور و ستايلات للغير محجبات و للمتحجبات أن شاء الله تعطيكم فكرة عامة على الموضوع
غير محجبات
اكيد لي يهدر على السروال جين يهدر على les boyfriend دارو حالة و كاين بزاف بنات يحبوهم
شوفو هاذا تا ع القطط شحال هايل 🤣😍
تقدري تلبسي سروال مع شوميز و تقدري تلبسي روب ميدي
ولى جيبة 😍 هاذ النوع من الجيبات شفتوا بزاف في العيد الصغير و صدقوني كلاس هايل هايل
و ما ننساوش الكونبي لي دارو حالة هاذ الفترة
المتحجبات ننتاقلو للمتحجبات ضرك :
المخطط راه على الموضة و السروال العريض و ليكات في الكمام عراض ايضا
هاذا نوعي المفضل مريح بزاف هاذ الستايل⬇️
هاذ الجيبات تاني راهم متواجدين بقوة هاذ الموسم ⬇️
هاذو صالوبات شحال هايلين😍 كاين هاكا شغل سروال وكاينشغل روبا
هاذا على شكل روب لي عندي منو صورتي رقم ٢ 🤗⬇️
هاذا اللون شحال باهي⬇️💙😍
خلاص كملنا مع القطع الرئيسية
نجو لبعض من الأحذية طبعا السنيكرز الأبيض لازم يكون عندك خاطرش يوالم بزاف لبسات
طبعا ما ننساوش المشهورة فانس لي وين نروح نلقاها 😅
علابالي حتى انتي عندك كامل الألوان فيها فقتلك
هاذا النوع يجي مع كلش :⬇️
و لي تحب الكلاسيك اخترتلك قطعتين أن شاء الله يعجبوك
جا وقت الحقائب :
مؤخرا عادة حقيبة الظهر الى الساحة بقوة :
الصاكودو تاعي 🤗
الماكياج :
هاذي نقطة مهمة يا بنات طبعا ما تخرجيش صابحة تخوفي الناس برا 🤣 نضحك علابالي زينات بلا ماكياج و لكن تاني ما ديريش قنطار !
١ديري كريم حماية من الشمس
٢يلا موالفة ديري فوندوتين ديري
٣ شوية برونزر + شوية هايليتر شوية برك فهمتي!
٤ يلا تحبي إيلينر ديريه وحدو بلا ألوان من فوق
٥ شوية ماسكارا
٦ طبعا و احمر شفاه ماشي احمر ديري نيود غوز كلير ..
و خلاص صايي حوطي تروسة تا ع ماكياج
ضرك ما تنساوش ديرو ستيك و بارفان و النظافة الشخصية بلا ما نوصيكم ما تخلوش الناس تهدر عليكم و تقول فايحين لازم ديما الريحة الله الله
و ديري اكسسوار:ساعة مثلا و خواتم على حساب واش رايحة تلبسي ..حاجة خفيفة يعني
و بصحتك العودة لمقاعد الدراسة لازم صباح كي تنوضي تديري نيتك انك رايحة تطلبي العلم و تدعي ربي يساعدك في مسيرتك هاذي و يسهلك راها قرايتك رأس مالك ابنتي
أن شاء الله مانكونش ثقلت عليكم و أن شاء الله عجبكم و استفادوا خلولي في تعليق واش رايحين تلبسو؟ واش تقراو؟واش عجبكم الموضوع؟واش من لبسة عجبتكم كثر ؟
يتبع …😃💋
🍁
J’aimeJ’aime